ԱԽՏՈՐՈՇՈՒՄ

39-ամյա կինը դիմել է Ուռուցքաբանության ազգային կենտրոն որովայնի աջ կեսում սուր ճառագայթող ցավերով, ունեցել է հևոց, զարկերակային ճնշման պարբերական բարձրացում, քրոնիկ փորկապություն, ընդհանուր թուլություն։

Հետազոտության արդյունքում հայտնաբերվել է մոտ 20 սմ չափի որովայնի խոռոչի ֆիբրոմիքսոմա (բարորակ արտաօրգանային ուռուցք), որը ներաճել էր որովայնի պատի մեջ, սեղմել էր աղիները` հանգեցնելով վերը նշված գանգատներին։ 

ՎԻՐԱՀԱՏՈՒԹՅՈՒՆ

4 ժամ տևած միջամտության ժամանակ ուռուցքի հետ հեռացվել էր նաև որովայնի պատի մկանային շերտը, ինչից հետո առաջացել էր որովայնի առաջնային պատի դեֆեկտ՝ 15 սմ չափով։

Դեֆեկտը վերականգնվել է չներծծվող ցանցով (պրոլենային ցանցով), մաշկը ամբողջությամբ պահպանվել է։

Վիրահատությունն իրականացրել են ՈՒԱԿ որովայնային և էնդովիրաբուժության բաժանմունքի բժիշկ Արթուր Առաքելյանը, ասիստենտ բժիշկ Ավետիք Պետրոսյանը և անեսթեզիոլոգ Սամվել Պողոսյանը:

ԴԵՊՔԻ ԱՌԱՆՁՆԱՀԱՏԿՈՒԹՅՈՒՆ

Պացիենտը 2021 թվականին վիրահատվել է ոտնաթաթի ֆիբրոմիքսոսարկոմայի կապակցությամբ։

Որովայնի խոռոչի գոյացության կապակցությամբ նախնական հետազոտության ժամանակ կասկած է եղել, որ այն ևս կարող է լինել չարորակ, որը հետագայում հերքվել է։

Նմանատիպ չափերի բարորակ այս ուռուցքը հազվադեպ է հանդիպում՝ ընդգրկելով որովայնի պատը՝ առանց հիվանդին էական անհանգստություն պատճառելու։

Պետք է նշել, որ փոքր չափերի նման ուռուցքները հիվանդին գանգատներ չեն պատճառում, որի կապակցությամբ ևս մեկ անգամ հորդորում ենք պարբերաբար անցնել կանխարգելիչ հետազոտություններ։

ՎԻՐԱՀԱՏՈՒԹՅՈՒՆԻՑ ՀԵՏՈ

Վիահատությունից հետո հիվանդը դուրս է գրվել վիրաբուժական ստացիոնարից, 2 շաբաթ անց վիրահատական վերքը լավացել է ամբողջությամբ։

Հոգալով ձեր առողջության և կյանքի որակի մասին՝ մեր մասնագետները փորձում են հասնել լավագույն արդյունքներին։