Տարիքը խոչընդոտ չէ արդյունավետ բուժման համար․ 89-ամյա կնոջ պատմությունը
Վ․ Ա․ Ֆանարջյանի անվան ուռուցքաբանության ազգային կենտրոնի Հեռահար ճառագայթային թերապիայի բաժանմունք էր դիմել 89-ամյա կին, ով գանգատվում էր քթի աջ թևի շրջանում առաջացած ուռուցքային գոյացությունից։
Անհրաժեշտ լաբորատոր, գործիքային և հյուսվածաբանական քննություններից հետո հիվանդի մոտ ախտորոշվել էր քթի մաշկի բազալ բջջային քաղցկեղ։ Հաշվի առնելով տարիքային գործոնը և ուղեկցող սրտի իշեմիկ հիվանդությունը՝ վիրահատական միջամտությունը համարվել էր ոչ ցանկալի։
Քննարկելով դեպքը ներհիվանդանոցային ուռուցքաբանական հանձնաժողովում, որոշվել էր իրականացնել քթի աջ թևի հեռահար արմատական ճառագայթային բուժում։ ՈՒԱԿ Հեռահար ճառագայթային թերապիայի բաժանմունքի բժիշկ Սերգո Մխիթարյանի գլխավորությամբ իրականացված բուժումն ընթացել է հարթ՝ առանց բարդությունների, դիտվել է ուռուցքի լրիվ ռեզորբցիա:
Այս հաջողությունը ևս մեկ անգամ ընդգծում է, որ ՈւԱԿ-ում կիրառվող տեխնոլոգիաներն ու բժիշկների փորձառությունը հնարավորություն են տալիս ապահովել որակյալ ու անվտանգ բուժում յուրաքանչյուր հիվանդի համար՝ անկախ տարիքից։
