Վ.Ա. Ֆանարջյանի անվան ուռուցքաբանության ազգային կենտրոնի մասնագետները հեռավար մասնակցել են «Ադիոր» (Ассоциация директоров и организаторов онкологической радиологии) միջազգային ասոցիացիայի կազմակերպած «Թոքի քաղցկեղ» թեմայով գիտաժողովին, որը համախմբել էր տարբեր երկրների առաջատար մասնագետներին՝ քննարկելու ժամանակակից ախտորոշման, բուժման և նորարարական մոտեցումների փորձը։

Կոնֆերանսի ընթացքում ներկայացվել է 14 գիտական զեկույց, որոնցից 4-ը՝ ՈՒԱԿ մասնագետների զեկույցներն էին։ Կենտրոնի Կրծքավանդակային վիրաբուժության և ինտերվենցիոն թոքաբանության բաժանմունքի վարիչ Տիգրան Բյուզանդյանը հանդես է եկել երկու զեկույցով․ առաջինում ներկայացվել է ինտերվենցիոն պուլմոնոլոգիայի նորարարական մոտեցումները տեղային տարածված թոքային քաղցկեղի դեպքում՝ ընդգրկելով ամբողջ շղթան ախտորոշումից մինչև պալիատիվ օգնություն, իսկ երկրորդում՝  կենտրոնական կարսինոիդի բարդ կլինիկական դեպք՝ կարսինոիդային համախտանիշի մանիֆեստացիայով, որն ընդգծել է նման դեպքերի ախտորոշման և բուժման դժվարությունները։

ՈՒԱԿ կրծքային վիրաբույժ Տարոն Ղարիբյանը ներկայացրել է հետազոտություն երկրորդային թոքային քաղցկեղի մասին, որը ձևավորվել էր լիմֆոմայի բուժումից հետո։ Նրա զեկույցը կարևորել է հիվանդության կրկնության կանխարգելման և վաղ ախտորոշման ռազմավարությունները։

Գիտաժողովում բժիշկ-քիմիաթերապևտ Կարինե Սողոմոնյանը ևս հանդես է եկել զեկուցով՝  ներկայացրել մետաստատիկ թոքային քաղցկեղի բուժման ինտեգրատիվ մոտեցումները՝ շեշտադրելով անհատականացված բուժման կարևորությունը և բուժառուի կարիքներին համահունչ ծրագրերի մշակումն ու կիրարկումը։

Մասնագիտական հարթակում հանդես գալով նման գիտական աշխատանքներով՝ Վ․ Ա․ Ֆանարջյանի անվան ուռուցքաբանության ազգային կենտրոնի բժիշկները ևս մեկ անգամ ընդգծել են կենտրոնի գիտական ներուժը և միջազգային համագործակցության ուղղությամբ իրենց ակտիվ ներգրավվածությունը։