Ծանոթացեք՝ 7 տարեկան Նարեկն է, երազում է ֆուտբոլիստ դառնալու մասին։ 

Հենց սիրելի ֆուտբոլն էլ օգնել է Նարեկին ճիշտ ժամանակին հայտնաբերել իր հիվանդությունը։ 

Ֆուտբոլ խաղալիս Նարեկը վնասել է ձեռքը, որից հետո ռենտգեն հետազոտությամբ ախտորոշվել է բազկոսկրի միջին երրորդականի պաթոլոգիկ կոտրվածք։ Նարեկի ծնողները դիմել են ՈՒԱԿ։

Կատարված լրացուցիչ հետազոտությունների արդյունքում Նարեկի մոտ հայտնաբերվել է աջ բազկոսկրի միջին երրոդականի անևրիզմալ ոսկրային կիստա։

Ուռուցքաբանության ազգային կենտրոնի Ս. Սեինյանի անվան ոսկրային ուռուցքաբանության բաժանմունքի մասնագետները որոշել են վիրահատել Նարեկին։ 

Կատարվել է բազկոսկրի սեգմենտար մասնահատում՝ պաթոլոգիկ օջախի հեռացումով։ Ոսկրային դեֆեկտը վերականգնվել է նրբոլոքից վերցված աուտոտրանսպլանտանտով և արհեստական ոսկրանյութով։

Նարեկն այժմ գտնվում է դինամիկ հսկողության տակ։

Նարեկն իրեն գովելիս (պետք է խոստովանենք, որ արդարացված է) ասում է, որ անգամ մեծ եղբորից է ավելի ուժեղ, չի վախեցել վիրահատությունից։ Սեպտեմբերի 1-ին պետք է 2-րդ դասարան գնար, բայց դասերը դեռևս տանն է անում։ Ասում է՝ սովորել շատ է սիրում, բայց ֆուտբոլ` ավելի շատ։

Անհամբեր է՝ երբ է վերադառնալու իր առօրյային։

Եկեք բոլորս Նարեկին շուտափույթ առողջանալ մաղթենք, և, իհարկե, նպատակների ու երազանքների իրականացում։ 

Լուսանկարը հրապարակվել է ծնողների թույլտվությամբ: