Վ. Ա. Ֆանարջյանի անվան ուռուցքաբանության ազգային կենտրոնում անցկացվեց հանրային դասախոսություն՝ նվիրված առողջապահության ոլորտում արհեստական ինտելեկտի (AI) կիրառության արդիական թեմային։ Դասախոսությունը կարդաց առողջապահության կառավարման և կազմակերպման ոլորտի ճանաչված մասնագետ, Ռուսաստանի Առողջապահության կազմակերպման և կառավարման բարձրագույն դպրոցի (ВШОУЗ) ռեկտոր, բժիշկ-գիտնական Գուզել Ուլումբեկովան։

Գուզել Ուլումբեկովան իր խոսքում ընդգծեց, որ արհեստական ինտելեկտի կիրառումը առողջապահության մեջ այլևս ապագայի հեռանկար չէ, այլ՝ արդեն իսկ ընթացող գործընթաց։ AI-ն կարող է օգնել հիվանդությունների վաղ հայտնաբերմանը, բուժման անհատական մոտեցումների մշակմանը, ինչպես նաև առողջապահական համակարգերի արդյունավետ կառավարմանը։

Միաժամանակ, նա շեշտեց նաև առկա ռիսկերը․ տվյալների պաշտպանության և գաղտնիության խնդիրները, առողջապահական անձնակազմի պատրաստվածության հարցերը, ինչպես նաև իրավական և էթիկական դաշտի բացերը։ Ուլումբեկովայի խոսքով՝ առանց հստակ կարգավորումների և կառավարման, տեխնոլոգիական առաջընթացը կարող է բախվել լուրջ խոչընդոտների։

Դասախոսության ավարտին նա ներկայացրեց ապագայի տեսլականը՝ նշելով, որ արհեստական ինտելեկտի հնարավորությունները կարող են արմատապես փոխել առողջապահական համակարգերի աշխատանքը՝ դարձնելով դրանք ավելի արագ արձագանքող, արդյունավետ և կենտրոնացած հիվանդի կարիքների վրա։

ՈՒԱԿ-ում կազմակերպված այս հանդիպումը հնարավորություն տվեց մասնագետներին և ուսանողներին քննարկելու առողջապահության և տեխնոլոգիական նորարարությունների հատման կետերը, ինչպես նաև փոխանակելու միջազգային փորձ։