Ն․ Ն.Պետրովի անվան ուռուցքաբանության ինստիտուտում երկշաբաթյա վերապատրաստում է անցել Օնկոգինեկոլոգիական բաժանմունքի մանկաբարձ-գինեկոլոգ Սիրան Խաչատրյանը։

Բժիշկը վերապատրաստվել է օնկոգինեկոլոգիական լապարասկոպիկ վիրահատություններում։

Երկշաբաթյա վերապատրաստումը Ուռուցքաբանության ազգային կենտրոնի բժշկին հնարավորություն է տվել ծանոթանալու օնկոգինեկոլոգիական եզակի դեպքերի հետ, մասնակցելու վիրահատություններին, ստանալու նոր գիտելիքներ, ձեռք բերելու նոր հմտություններ, յուրացնելու նոր մեթոդներ, որոնք կկիրառվեն ՈՒԱԿ-ում։ 

Լապարասկոպիկ վիրահատությունները ունեն մի շարք առավելություններ։ Դրանց մեջ կարելի է առանձնացնել վիրահատության՝ ավելի քիչ տրավմատիկ լինելը, վիրահատությունից հետո հարթ և արագ վերականգնումը։

Բժիշկը շարունակելու է վերապատրաստվել։ Հոկտեմբերին Սիրան Խաչատրյանը վերադառնալու է Սանկտ Պետերբուրգ՝ նոր գիտելիքների հետևից։

Հիշեցնենք, որ 2022 նոյեմբերի 26-ին՝ «Հայ-ռուսական առողջապահական 7-րդ ֆորում»-ի ընթացքում ստորագրվել է համագործակցության հուշագիր ՀՀ ԱՆ Վ.Ա. Ֆանարջյանի անվան Ուռուցքաբանության ազգային կենտրոնի և ՌԴ Ն.Ն. Պետրովի անվան Ուռուցքաբանության գիտահետազոտական ինստիտուտի միջև: Ըստ հուշագրի կետերից մեկի՝ մասնագետներին ընձեռվել է վերապատրաստելու հնարավորություն մյուս առողջապահական կառույցում։