ՈՒԱԿ-ի կրծքավանդակային վիրաբուժության և ինտերվենցիոն թոքաբանության բաժնի ղեկավար, թորակալ վիրաբույժ Տիգրան Բյուզանդյանը օրերս վերադարձել է Չինաստանից, որտեղ հրավիրված էր Institute of Chest Wall Surgery (ICWS)-ի կողմից՝ գիտա-գործնական վերապատրաստման։

Այցի ընթացքում բժիշկ Բյուզանդյանը անմիջականորեն մասնակցել է մի շադք վիրահատությունների՝ ոլորտի լեգենդար մասնագետ, բազմամյա փորձ ունեցող պրոֆեսոր Վենլին Վանգի գլխավորությամբ (բժիշկն իրականացրել է ավելի քան 10 000 վիրահատություն վերջին 7 տարիների ընթացքում)։ Հատկանշական է, որ այս ինստիտուտում մեկ օրում իրականցվող ռեկորդային՝ մինչև 47 տարբեր բարդության վիրահատության շեմն այցի օրերին գերազանցվեց՝ հասցվելով մեկ օրվա ընթացքում 83 վիրահատության, ինչը հնարավորություն տվեց կուտակելու աննախադեպ ծավալի մասնագիտական փորձ։

Բացի նոր գործնական հմտությունների յուրացումից, այցը հագեցած էր գիտական քննարկումներով, նորարարական մոտեցումների ուսումնասիրությամբ և միջազգային փորձի ակտիվ փոխանակմամբ։

Այդ օրերին անցկացվել է Կրծքավանդակի պատի վիրաբուժության առաջին համաշխարհային կոնֆերանսը, որի մոդերացիան վստահվել էր հենց մեր մասնագետին՝ ներկայացնելով Հայաստանը համաշխարհային հարթակում։ Ինչպես նաև բժիշկ Բյուզանդյանն իր զեկույցի ընթացքում անդրադարձել է մեր կենտրոնում իրականացվող կրծքավանդակի պատի մինիմալ ինվազի վիրաբուժության փորձին: 

Անմասն չէին նաև մրցանակաները. բժիշկն արժանացել է նոմինացիայի՝ լավագույն վերապատրաստվող: 

Այս ձեռքբերումները ոչ միայն հարստացնում են մեր մասնագետների գիտելիքներն ու հմտությունները, այլև ամրապնդում են Հայաստանի դիրքը բժշկության համաշխարհային քարտեզում։ 

ՈՒԱԿ-ի զարգացման ճանապարհը շարունակվում է՝ նոր գիտելիքներով, նոր նպատակներով և ավելի շատ կյանքեր փրկելու վճռականությամբ։